admin 
شعر /عفاف أحمد التركي – مصر
كان بقوة ..9 ريختر ..جوّه روحي
هل ثباتي اهتز .. ام عيب خطوتي؟
هل بديل النز ..اني باختزن ؟
هل مليت وقت الفراغ..بمعاتبتي؟
وسّع دوايرك للصُحاب..اذ ربما
يبعتروك وسط الكلام ..ينسوك
الدعوتين لا شك ممكن يسندوك
ويفرجوا ع الروح بشوية بُكا
طب امتي غيرنا هيقتنع.. اننا
ما بايدنا نرمي نفسنا في التهلكة ..؟؟
ايوب وصبره وحكمته.. بيستوعبوك
والكرّة.. بتعيد نفسها
لحظة ما بتحاول تقوم من مطرحك ..
بتغُض عين الخطوة ..خشية تجرحك
فـ بتنفرط حبّات دُعا ..علي طبطبة ..
فتحس غُربة مُتعبة ..بتحنّنك وتطوّحك
يِعلي صوت البرطمة .. بغاية الثقة
فجأة تشعر سيل وجع بيمسرحك
ازاااي كده؟..
ربكة ايقاع الحلم ..بيعفّر منامك
وانت وعلامك والقصايد مذهولين
قاطع رحم كل المشاعر .. عن رضا
معترف..انك في لحظة الضعف المبين
وانك مجرجر حسرتك ..بوقار
وانك حمار بيعد..كام واحد وقع .
.لحظة ما ظهرك شال حواديتهم رموك
ربنا يرحم ابوك ..
ماكانش اخّر جهده يرزع جنابك كام قلم
..لاجلٍ..تفوق..
و يوبّخك…ع الخيبة اللي صابت ما خلّت
والا كما عادته معاك راح يحضنك..
ويطيّب الحزن اللي،فيك
قوم كده.. الليل ازف
اسند علي الحواديت وهي توصّلك..
وسيب ايديك اتعودت علي مسكة العكّاز ..
وعلي اللحن الجديد للخطوة اللي بتعزفك ..
وبتلفت انتباه راجل كفيف فيدعي لك .
.وتدعي له وانت بتضحك جدا من هول المفارقة
وعبثية المشهد ..
من دواعي عِزة نفسك اللي بتفتح جرحك تاني..
لواحد قاعد جنب سيادتك..بيقول لك
..وحّد ..خليها علي الله
..فبتستسلم ..وتسيب روحك .. للزلزال
واديك طلعت من الهدد ..
بكلمتين حبكوك تدخنّهم في وش الشعر ..
جايز ينسطل
او ينفتل من ذقن هذا الوقت اجابة مؤجلة
او يجي لك مرسال..
علي هيئة قصة مشابهة بتجبرك..
تسمع غصب اللي رافض تسمعه بكيفك ..
في اللحظة دي ..لوحدك بتدرك سذاجتك ..
تقوم مبرطم كام قصيدة مهيأة..
تمتص كل اللخبطة وترتاح
طول ما انت في وضع السكون .. مرتاح
والامر ما بيسلمش من بعض التوابع ..
لو سيرة عدّت ف الكلام عن حد..
او حد عصرك ضحك ومناهدة ..
او يمدحوك ..فبيرتفع سهم المشاهدة
ساعتها زلزالك ..بيوصل منتهاه
فيهد ..رغماً ..معبدك
وتبقي نجدة ربنا ..لو انقذوك من تحت انقاضك
انت والعكّاز .
