كتبت : بشري حبيب
مسئوليتنا تجاه حماية أبنائنا تشاركية، لا يشترط أن نلدهم لنحميهم، فالمسئولية ممتدة
فهم ثروة مجتمعنا وسلامتهم نُساءل عنها كمجتمع وليس كأفراد إذا أردنا مستقبلا أفضل لبلادنا.
والعالم حولنا ملىء بالخير والجمال والحب، وهو أيضا به شر ومرض ومخاطر،
وعلينا أن نربى أبناءنا على حماية أنفسهم دون أن نجرح براءتهم وثقتهم فى الآخرين
دون أن نزرع فيهم الخوف وسوء الظن.
بنتك في سن المراهقه ؟
طبعا الكل متابع أخبار (المتحرش . المغتصب)
ده ليه حصل ؟ وإزاي ميحصلش لبنتك ؟
خمس خطوات علشان بنتك تتجنب التحرش
اولا التواصل والثقه :
لما تلاقي عشرات البنات المراهقات وفي روايات مئات عن الشخص ده و محدش فيهم بيتكلم سنين .
كله ساكت . أهلهم في صدمه . مش مصدقين . وفيه أهل لسه مش عارفين لحد اللحظة ديه.
لازم تفهمي إن فيه أزمه ثقه بين البنات ديه وأهلها . مفيش تواصل وحوار حقيقي .
إن موضوع زي ده يحصل بدون علم الأهالي معناه إن البنات في وادي وأهلهم في وادي .
قربي من بنتك . إحتويها . صاحبيها . وعرفيها لو حصل أي شيء انا معاكي . انا جمبك . انا في صفك.
ثانيا سيناريو التحرش :
إتكلمي معاها وقوليلها لو حد عمل معاكي كذا هتعملي إيه ؟
لو حد قالك كذا هتردي عليه بإيه ؟
لو حد حاول يعمل كذا رد فعلك هيكون عامل ازاي ؟
أغلب البنات بتتصدم لما حد بيتحرش بيهم وفعليا مبيكونش عندهم أي سيناريوهات كرد فعل .
الأغلب بيكون عنه خوف و بيسكت والمتحرش متمرس وبيستغل الموضوع ده بشكل كبير للوصول لهدفه .
دايماً حاولي تنصحي بنتك بطرق التعامل مع المواقف اللي ممكن تحصل وعرفيها انها قويه وانها تقدر تقول لا
وتقدر كمان تاخد خطوه جريئه توقف المتحرش و تسجنه كمان علشان يكون عبره .
ثالثا ثقفيها جنسيا :
ماهو لو مش إنتي اللي هتثقفي بنتك جنسياً . مين اللي هيثقفها ؟
الصندوق الأسود والغموض الكبير حولين موضوع الجنس
ده بيكون سبب رئيسي للفضول وإنها عاوزه تفهم وتعرف إيه الموضوع ده .
ساعتها هيكون مصدر المعلومات مين ؟
ثقفي بنتك بشكل سليم .
فهميها الحدود .
عرفيها الصح والغلط .
إشرحي لها شكل العلاقات السليمه .
سن المراهقة هو أفضل سن تقدري فيه تخلي بنتك صاحبتك.
رابعا الحب الحقيقي :
المتحرش بيكون خبيث جدا وبيشوف نقط الضعف عند ضحيته .
أغلب المراهقات بيكون عندهم إحتياج حقيقي لمشاعر الحب والإهتمام اللي للأسف المفروض تكون موجوده في البيت
وكافيه جدا في المرحله ديه وتشبعها لحد ما تلاقي شريك حياتها اللي هيصونها.
عدم الكلام عن معنى الحب الحقيقي مع بنتك وتوعيتها
ممكن يكون سبب رئيسي إنها تسمع أي حد هيقول أي كلام يسيطر على عقلها
ويخليها تبدأ تخبي وتعمل حاجات كتير مش المفروض تعملها.
خامسا ماما النعامه :
للأسف بعض الأمهات بدل ما تكون داعمه لبنتها في ظرف زي ده لو حصل لها . بتكون زي النعامه بتدفن راسها في التراب
وتقولها . بس . إوعي تتكلمي في اللي حصل ده خالص . متقوليش لحد . وبتدمرها نفسيا بمعنى الكلمه .
للأسف الموضوع ساعات بيكون أسوأ واللوم يقع على البنت ويكون منتظرها معامله جافه سيئه وعقاب وحبس .
الإجراءات ديه كلها بتقتل البنت نفسياً.
دعمك لبنتك واحد من أهم الخطوات اللي هيا محتجاها .
لأن فعلياً ملهاش غيرك بعد ربنا.
أوعوا تجوعوا ولادكم حب، فيضطروا ياكلوا من زبالة العلاقات
admin 
