admin 
محمد ياسين الكاشف
شريط عمري اللي راح في الزحمة
وانا تايه
هَالِمُّه وادوس على ترابه
واشَقْشَقْ فوق جبين الأرض
متر ف متر
عشان وقت اللزوم هامشي
واسيب ورا ضهري حِمْل تقيل
نسيت قلبي اللي داب م الشوق
نسيت كل الكلام الحلو وعمايله
ومين غرقني بجمايله
ومين سابني في عز الحوجة
محتاجله
وانا اللي غرقت في بحورِك
وياما عشقت من نورِك
وفي الآخر مانيش بحار
ضعيف عاجز بقلب خفيف
ومش قادر على التيار
لكن بالرغم من ذلك
في قلبي الحر قوة تهد
فيكي جبال
وهافضل ليكي في عنيكي
انا رحال
اموت مغرم صبابة عشق
على قدي
وياما الحالة بتعدي
وبابني الحلم وياكي
لكن انتي اللي بتهدي
انا مش نوح ولا آدم
ولا ف عز الجراح ايوب
انا الصابر على البلوى وعلى قهرك
وكلي ذنوب
كتير باسرح في ملكوتك
والَوِّنْ بكره للفقرا
كلام معسول
واصلي كمان في محرابك
عشان ارجع واحن واتوب
