وش عمِّي 

من ديوان ملح الوشوش للشاعر وليد مليجى 

 وش عمِّي 

هز التوتة و نادى عيالك
يمكن ينزل حبة توت
دير الساقية و لف وراها
يمكن مرة تنام مبسوط
لف و دور
مانت الحيطة المايلة بكيفك
و انت يا عمِّى قبلت الدور
و نسيت إنك صاحب فضل
انت لا ناقص قلب و روح
أو ناقص فيك حكمة و عقل
حط ف بالك
إن الكل فروع دبلانة
و انت الأصل
و اللى بيظلم
قايم نايم و بيتهنى بضل التوتة
ياكل منها و ينكر خيرها
يحكى عليها 100 حدوتة
شوف لو كنت ف عز البرد
كل الناس فى البيت دفيانة
و انت بتشقى ف وسط الأرض
شوف الدنيا لما تمطَّر
كله بيجرى أوام يتفرَّج
م البلكونة
أجمل منظر
و انت تشيل فى تراب السكة
تردم فوق السطح البايش
لكن ناسى
إنك منسى و مانتش عايش
حتى بتنزل عز الحر
لما الشمس بتاكل وشك
و انت المحنى لآخر ضهرك
فيه سكين مغروس من مدة
و انت مواصل
من غير فاصل
نفسك توصل مرَّة البر
دايما راضى
شايف إن حمارك أحسن
م المرسيدس و البى – إم
شايف إن غموسك سكر
و انت الطافح بيننا الدم
حتى الغنوة اللى بتطربنا
ما بتسمعها
رغم ان انت الغنوة ف قلبى و …
عايش معها
مانت اللقمة اللى تقَوِّتنا
و انت غموسها
و انت الحكمة اللى بتهدينا
و انت دروسها
يلا ياعمِّى شد حزامك
عمر ما يوم هيعينك وِلدك
أو حكَّامك
خلص وشك من كراميشه
شايف ؟ .. كل الناس بيعيشوا
إرفع راسك و امسك فاسك
و ارجع غَنِّى
تلقى الكل معاك بيغَنِّى
حقك تبقى كبيرنا يا عمِّى
و انت ف إيدك وردة و قوت
دِير الساقية و سيبها تدور
و اروى التوتة و هز يا عمِّى
لازم لازم…. ينزل توت