admin 
شعر عامية لنورا يحى – الجيزة
ياللي عمري كله كتاب يادوبك صفحتين
صفحة دايبة من الهموم
وصفحة تاه فيها الأمل
وسألت نفسي العمر رايح بيّا فين
أو هل يجوز أدفع في شئ ما أخدتهوش..
وتكون سنين عمري التمن
ودعيت لربي إنه يرجعلي الزمن
والقاني بيك
فجأة أستجابت دعوتي …وندهتني
وماكنتش أعرف
قدّ إيه أنا
اسمي حلو
غير لمّا يعني سمعته منّك
فقوله تاني من جديد
وعِيد وزيد
الحب عيد
وقلوبنا مشتاقة الفرح
يداوي كل اللي ف يوم قلبه انجرح
وأنا نفسي أكون
ف زمرة العشاق شويّة
خلّي التاريخ
ف العشق يكتب ما يشاء
وأنا قصتي بالحتم جايه
أدي إيزيس واتْجمّعت بحبيبها
تاني من جديد
وأدي عنترة فارس همام
الحب حوّل قصّته
من عبد راعي للغنم
ل أمير على عرش الغرام
وأدي فلان
وأدي فلان
وقصص كتير
راح تبقى باقية بدون جدال
مهما الزمان صابه الجنون
الحب شاعر له عيون
بيْدُور على كل البشر
