هاقولك إيه

نورا يحى 

هاقولك إيه
هاقولك ماتت الضحكة قُصاد عيني
هاقولك بانت التجاعيد
على قلبي وعلى سنيني
تعالي حبيبتي ضمّيني
وخلّيني اعيش تاني
حقيقي يا امي وحشاني
ومهما حاولت أقول فيكي
او اوصف ربع احزاني
بلاقي حروفي متْكفّيش
ولو قلت…..
إن انا عايشة فانا والله كدّابة
عشان روحي بقت تايهه
وكل جوارحي رافضة تعيش
قفلت الشيش
على كل اللي راح والجي
يا ضي عيوني
ياللي ما شُفت بعدك ضي
أنا عايشة على الذكرى
ذكرى اللمّة والفرحة
ودمْعك لما شوفتيني
بفستاني وبالطرحة
بقيت سارحة
ف دنيا غريبة وعجيبة
ماتشبهنيش
بقيت لما يدق الباب اقول امي
يدق الباب اقول أمي
يا دنيا والنبي سمّي
على قلبي الحزين بشويش
ما بين اللحظة والتانية
باموت م الخوف
اخاف لما يجيني الليل
واخاف لما يهل الصبح
واخاف م الفرح واخاف الجرح
واخاف ولا ….كفاية كلام
داوشتِك يامه سامحيني
ف يلا سلام
سلام يامه يا نور العين
سلام من بنت خدها الشوق
ف كَتَبِت ف الفراق سطرين
نورا يحيى