نفس الوداع

أسماء_عبدالخالق

نفس الوداع

على رصيف مترو السلام

ولا عمر كان للايد سلام

كان حضن تايه في الزحام

أيوه هنا

نفس المكان

بس إحنا بنكابر كمان

يمكن أمل

أو اشتياق

لكن، وداع

ولا عمر كان وداع الروح باقي

كل الوداع

قاسي ومتداري

ورا دمعه حايره من الجفون

قاصد تقول أسف ؟؟

طب على إيه

كلمة أسف هتعيد لي إيه ؟!

هتعيد لي قلب من الجنة ملهوش بر

مات من زمان

وقت ما تكسر جناحه

وملقهش حد

نفس الوداع

كان عابر على سكة موئودة

زي عمود النور

في حارة مدفونة

موطي رأسه للوجع

نوره انطفي

مش لاقي ضي

نفس الوداع

كان قطر دايس على الجبين

يمكن حنين

يمكن ألم

بس الوداع كان خط راشق في الفؤاد

عدى الضلوع

خرج بروح صاحبها

ومات موجوع

أصل الوداع كافر

كافر بكل أصول الحب واللمه

لا له ضمير

ولا قلب ولا ضمه

فاقد بصر

فاقد أمان

وإلا مكنش اسمه الوداع