مستعجل ليه؟

عفاف أحمد التركى

مستعجل ليه؟

كان بينّا ميعاد

كان نفسي اشوفك بابا فؤاد

وارتاح للنظرة اللي،في عينك

وانت بتقرألي فـ اشعارك

وانا باتفزّز فـ مكاني

.. وباقول اااالله

القطر اللي مسافر بيكم

ماخطرش،في باله ياخدني معاه؟

بلد الغاليين اللي مفارفين

ما صعبش عليه دمع عينينا

وانتوا مسافرين ؟

ما عملش حساب اصحي من النوم

علي حد عزيز يقطع بينا ؟

القطر القشّاش ..متعوّد

علي دمع غيابكم فـ عينينا ؟

..بيصفّر توووووت ..

عمر وبيفوت يطرح فينا

ما بيستناش نركب صحبة

ونغني كام غنوة حزينة ؟

تصبّر وجع القلب عليك ..

ارجع يا غريب..

ونسك موجود وسط كلامك

عشمك متعشّم ..يحكي لنا

عن عرق العمّال والثورة

وكأن عيونك شقّت غيب

وفي عيد الثورة تموت وحدك

من غير ما تودّع انسان

لسان حالك علّمنا الدرس

الفكر شجاع..والجسم جبان

انا سايب ليكم يا ولادي

الطبل البلدي اللي اتفرق

نوتة أحزان

ليل المحروسة وغناويها

لشاعر عشمان

وانت ..

( شايف البشر أوراق..

فيها عديد العِبر )..

واحنا اللي ما شفناش

احنا اللي ما فهمناش

واحنا اللي مش داريين

شعرك بيتسطّح ..

علي ظهر بني ادمين

شايلاك غُنا ..وتقاسيم

شايلاك نغم..وانين

شايلاك وطن اخضر ..

طارح سلام ورحيم

حنّن يا موت قلبك ..

قل لي البقاء لله..

لو عزّي فيه الشِعر

والا انبكي معناه

اخره..يدمّع فيك

لو جت في يوم سيرة

الصبر ..تصبيرة

تحويجة م المخصوص

علي شعر متطعّم..

احجار عقيق وفاروز

وبنقشة الارآابيسك..

يجعل ختامك ..مسك

هناك مافيش محاسيب

لا خيار ..ولا فاقّوس

هناك..فتح لك قوس

ضِمن اللي مش راجعين

هناك..ونس غيرنا

وبنتولد فاهمين.

………………………..

الوداع ايها الحنون الرقيق

وداعاً بابا فؤاد

مش هامسح رقمك من عندي .