admin 
محمد احمد اسماعيل
ماشيين على نور نوّار الأرض..
بنصلِّي الفرض ف حِجر النخل المتوضِّي سلام ومحبة
والمية الغندورة الشابَّة..
بتبوح بالسِّر المكنون في الزَّهْر
وتمد إيديها وتغسل ضمايرنا
وتدعي لنا بالستر
وتفسَّر حلم التين النَّعسانْ..
على ضِلع الأيام البيضا
أبو ضحكة ترِن
والنوى لو نوى ع النوى بِيحِن
والفَرْح قَرِيب
ما تطِيب.. يا بلح
يا بلح.. ما تطيب
وكفاية دلع
وكفاية شقا
لِم لجام الغُربة بقى..
لم لجام الغربة بقى..
وارجع يا غريب
