لوحة مصر

شعر: خالد الجمَّال

مصر أنا فاتحة أدين
لكل ولادى الوطنيين
قلبي معاكم بس حزين
م اللي بيحصل م الأخين
……………
شرطة وجيش شعب أصيل
عمره ما سلم يوم لعميل
والليبرالي والعلماني أبن النيل
ازاي يبقي عدو الدين
……………
مسلم قبطي أو نصرانى
أيد في الإيد من غير ما نميل
سلامي يبقي لكل الناس
في القرآن وفي الإنجيل
……………….
وطنى إيمانى نيله روانى
نلقي رباطنا قوي و متين
عبى واشرب م الإحساس
واللي عدانا هيروح فين
…………….
بركان فاير جرحه أليم
وسلام طاير قلبه حليم
واللي يخودنا بحضن سليم
يطرح منا حلاوة جيل
……………..
كنا زمان زمان وزمان
حب مسطر ع الجدران
نوره يعلم في الإنسان
طرح ثمارنا رضا وحنين
………………..
اخناتون بيرد أمون
ثورة دينية كسبها أتون
التوحيد هو اللي يكون
خيره في قلب المصريين
………………….
يوسف موسي وكان إدريس
دخلها يسوع وبقالنا عريس
احفظ وطنك م التدليس
مصر بناها دم وطين
…………..
تمشي أيام وتعدى أيام
حلم وسطر في الوجدان
ثورة حب بناها سلام
نحلم بيها زمن وسنين
……………….
راية مصر بتسأل عنكم
ع اللي معاكم واللي شاغلكم
واللي يجرح فيها يعبكم
قطع قلبي بميت سكين
…………….
يالا الهمة جهز نفسك
في الوطنية أحفر أسمك
دى الوطنية رسمت رسمك
مصر لوحتها دنيا ودين