admin 
بقلم فيفى سعيد محمود
إتقفل الباب وخلص شهد العسل
وبقينا فى أرض المعمعة .
حبيبتى وحبيبى بقت نار جهنم فى البيت .
أمك مش طايقانى .
أمك خرابة بيوت .
أختك بتشتمنى أنا كمان لو مبطلتش هرد عليها .
هولع فيك حذارى دى أختى إلزمى حدودك .
وبعدين بقه إيه يعنى لسة مجبناش ولاد .
أعمل إيه حظى كده كل إللى اتجوزوا معايا معاهم عيال .
أنا معنديش مشكلة .
يعنى أنا إللى عندى .
يبنى دى مبتخلفش سيبك منها وهات غيرها عاوزين عيال .
معلش نصبر عليها شوى .
وبقى البيت على كف عفريت .
أنا سايبالك البيت وماشية .
حبيبتى متزعليش إهدى وبكرة تتحل .
مش عاوز أشوف دموع فى عينيكى .
ترجع ريمة لعادتها القديمة .
إنتى لسة مجبتيش عيال .
وبعدين فى مامتك بقه .
بقلك إيه إلزمى حدودك مش عاجبك إمشى غورى فى داهية دى حاجة تقرف .
عيطى ولا موتى حتى أنا سايبلك الأوضة .
أف دى حاجة تقرف .
إيه مالك يا حبيبى متضايق ليه .؟
وإنتى مالك شوفيلك مصلحة غيرى .
مفيش كل شغل البيت تمام ،هدومك مكوية ،الأكل معمول ،شقة مامتك تمام ،والولاد ناموا ،إيه بقه مزهقك ومخلى مزاجك معكر ؟
إنتى مالك غورى من وشى شوفيلك مصلحة غيرى .
ماباقيش غير بيت الجيران أروح أسيقه .
إنتى زهقتنى بره بتضحك ومحدش عارف يسكتك جوة البيت مادد بوز ،تاكل من غير ما تعزم حتى عليا ولا تسألنى كلت ولا لأ .
أعيط،، إتفلقى ،
حكايتك إيه ؟
شايفلك شوفة قول نرسى ونعرف
أوووووه كل كلمة موال وحكاية ورغى أنا قرفت منك .ملعون أبو اليوم إللى شفتك فيه وإتجوزتك
تصدق أنا كمان كان يوم إسود .
تفتكر أيها الرجل لما تعامل مراتك كده إنت راجل ؟
لما تهينها تبقى راجل ؟
لما إيدك تتمد عليها وتضربها وتجرحها بسبب وبدون سبب إنت راجل ؟
ماهيا مش عبدة عندك ولا متجوزة بلطجى علشان كده .
لو الست ردت يبقى من غلبها
لو بكت يبقى مقهورة .
لو نامت زعلانة منك وومسحتش دمعتها وإنت وعدتها بالسعادة والعسل .
يبقى متلومش نفسك لو كيان البيت إتهز .
لو جيت ولقيت الكرسى فى البيت إتهز وإتحرك ونطق ورد.
الدفة تبدأ عندك بعدلك وحنانك ومعاملتك ليها .
لما تبقى حبيبتك وتسمح تتهان من أهلك أو منك وولادك شايفين .
لما تبقى حبيبتك وتعذبها معاك .
إفتكر إن الزواج مش مجرد رباط وعقد وخلاص ده مودة وسكن وروحين فى روح واحدة .
وللحديث بقية
