admin 
شعر / ماهر أبوالمعاطى
خارج حدود الشمس
وعموم المجرة
كوكب عينيكِ
بدعة من صنع الإله
علم الفلك
عاجز أمام
تفسير ظواهر
سحرك الهادم جميع الأنظمة
فيصير تلسكوب الهوى
هو اللى راصد كوكبك
عين البصيرة المُلهَمة
بتشوف بنن القلب
كل الأمكنة
هى الحقيقة الممكنة
وسط التشابه ف الصور
يبقى التفرد معضلة
تحتج فيه الشمس
تبعت رسالة للقمر
ما أقدرش أبعت ضوئى
ف الليل البهيم
علشان يهيم
ف عينيها والضوء الجلى
يا مبتلى بالعشق
هتلاقى عذرك ف الهوى
كوكب عينيها
اللى سكن داخل عيونك
من زمن
فبتّمتحن
بالعشق والسحر الخفى
فبتختفى كل الظواهر
من خسوف الشمس
أو حتى الكسوف
تلقى الظروف
مُصرة تُعلن محكمة
علشان تَعَاقب ليلنا
من بعد النهار
والشمس واخدلنا القرار
أن الضياء
ياخد إجازة مُعلنة
لحين اكتشافه للسر الخفى
ورا السطوع ف كوكبك
والعلما شافوا مؤخراً
ده الأرض لفت
جوه حيرة مؤكدة
حاسة بضياع
وأهو خط جرينتش
ساب المدار
أما خط الإستواء
بهتت ملامحه
ع الخريطة تصحراً
وف لحظة ضاع
والأرض وقفت فجأة
وازاى راح تعود
تاهت خطاوى فكرها
ف الرحلة
من منجم الخصر العفى
لحد النهود
أما النجوم
عاشت سنين متمردة
متنمردة
على فكرة ان تقوم بدورها
نتمنى لحظة كلنا نفرح بنورها
وأهى توفى لينا بالمرة
بكل ألوان العهود
فتلقى كهفك المخبوء
يشع أمامى كالدُرة
والاقى نوره يبهرنا
من اعلى النهد للصُرة
وجاى بسحره يتمدد
لحد مداخل الأخدود
وأنا عارف مشكلة أرضى
وحاسس معضلة شمسى
بأنى وحدى باتحكم
ف كوكب عينيك الدُرى
ومهما حاولت أتخفى
وأخبى عنكم سرى
فلازم يبقى إيثارى
مقاومة لنزقى السارى
يأدب فكر لاستحواذ
يا إما قرارى بالإنصاف
أمام الخلق والعامة
بأن عيونك الحلوة
قد آلت
بحكمى ومن ورا قلبى
لتصبح منفعة عامة
ورغم صعوبة الفكرة
والاقى خلاص ومن بكرة
حبيبتى مشاع
وأى ضياع
فلاقى قلبى يهدينى
لحضن هواها باستئثار
وغيرة روحى تحكمنى
بفعل النار
وأقول برضه من الأحسن
ويستحسن
نخلى الرمش فدادينه
تغطى العين
ويرجع تانى للكوكب
ضياء وحنين
وترجع شمسنا تنور
وتدى نورها لقمرنا
وترجع أرضنا تانى
تلف ف دورة طبيعية
ولو حبت حبيبتى تفتح
وتطلق سحرها الأخاذ
سأعلن ليكو من تانى
ماعدش خلاص بإمكانى
أقاوم فكرى ف استحواذ
وأعيش أتهنى بعنيكِ
ويضحى حُكمى مشمولاً
أمام الجمع ف الكوكب
بكل نفاذ
