كلام لزوم الكلام

شعر : محمد عبد الرحمن حجازي – مصر

ما بين السطر والمسطور

حدود البوح بتتملى

ف لغز الروح

ومستورنا

ومقدورنا بلا علة

وتترجى على لساني

زمان تاني ميشبهش

زمان المغرمين بالصمت

ويا بكره أنا وشمك على وقتك

ونقشك فوق جدور الصمت

وحلفتك

بخط النسخ والرقعة

وروح إقرأ وبالواقعة

تحاجي علينا بين إيدك

ويا بكرة إذا جيتك

بتوب يأسي متنكرنيش

دنا اللي ف حلمي خبيتك

وعديتك من التهميش

متتركنيش بلا داعي

دور جوه أوجاعي

على لحظة ما بتصديش

صبرني على وقتي

وع الخلق اللي بتوطي

وتدفن صوتها ف سكوتها

وتتحجج بأكل العيش