admin 
شعر : أشرف جاويش
يا سيدى خلاص..
ما عاد فاضل بجسمي مكان مجرَّحتوش
ولا هِنتوش..
خلاص فاض بيه منى الكيل
وصبح وليل وأنا ببكى..
ونظرة عيني لو تشكى..
تقول كفياك.
يا حسرة عمر وسنينة قضيتها معاك،
خلاص بتقول متلزمنيش؟!
وأنا من كلمة وعبارة وخوفي عليك
بنيت جنتك ببلاش وبُست اديك،
وقلت يا بِتّ من بكرة فيه فجر جديد،
وشمس أكيد تنور ضلمتك يعنى..
ما هو اللي في حبه طمَّعنى..
وبره حياتى طلّعنى..
شايل لك ايه غير الفرحة
غير الطرحة
غير إنه يطوف ببستانِك
يقف حارس على بابِك،
ويزرع فرحتك بإديه.
ويبقى سعيد..
ويبقى حزنه في وجودِك..
كأنه سطر مش مكتوب،
وأنام على كفه وادفّا برمش عنيه،
فراشة الدنيا خدعتها، هتعمل ايه؟!
لقيت نفسى في بستانه.. فتح لي الباب،
ومن يومها مفيش مخرج
ولا في هروب،
وكل يومين تدقّ فراشه على بابه..
يقوم يفتح..
يدخّلها ويتبسم.. فاعل خير،
وفى كتابه..
لقيت جناحات بتتكسر
وألف فراشة تتحسر..
ويصرخ في برود فيّه
دي حرية..
دا مشروع ميه في الميه
أنا راجل بحب أعيش..
وبعد الحب والعشرة ولقمة عيش
قال لي خلاص..
طالما بتحجري عليه
متلزمنيش.
فتح بابه لجناح مكسور وقال له طير
بيني وبينِك
فراقنا اكيد نهايته خير
وأنا مقدرش أصوم أصلى
لما فراشة تضحك لي
أقوم أتوضا من ريحها
وأختم كل تصاريحها
ولو ألوانها مش زاهية
أقول أبدا متلزمنيش
أنا في صيد الفراش أصلى
مبصطدشى غير الأصلي..
ولو دبح الفراش نصلى..
يبقى خلاص
ميلزمنيش..
لعله خير..
بس أمانة يا فراشة متكرهنيش
أصلى مريض..
أيوة مريض.. ليه الدهشة؟!
مريض برجولة جبارة..
لكن هشَّة
مع إني..
ضربة رمحي ما بتخيب..
بتقتلنى
وأقوم مبسوط
وكل فراشة وفراشة
بتاخد منِّى
ميت نبوت
وأنا اللي بموت
وأكفر عن ذنوبي يا دوب
بورقة توت.
أرد وأقول له ودموعي
بتروي نفس مكسورة..
كأنى وقعت من برواز
صورة إزاز..
بترسم قسوة الأيام على خدى
وجوه عنيه ألف حكاية محفورة
بتحكى عن فنون الغدر
قصة ألف فراشة مقهورة
يا سيدى خلاص..
سيبنى وامضى في سبيلك
لا انا محتاجة منك حب
ولا همسح دموعي خلاص في منديلك
ولا قلبي في ساعة شوق يناديلك
خلاص حرَّمت..
خلاص الدرس علّمني
لا نار البعد تألمنى
ولا يحرقني قنديلك.
بس نصيحة لو تسمع..
مع دموعك… وقت الذكر والتسابيح
بلاش يا نسر تتعافى على عصفور بقلب جريح
سفينتك لو جبال شامخة مسيرها تعترضها الريح
وأرضك لو جِنان طارحة تبات مالحة بوش قبيح
ما دمت بتستبيح أرضى..
ما دمت بتستبيح عرضي..
إيمانك بالصلاة والصوم
قناع زايف وكفر صريح.
