admin 
د. شيرين علي زكي
أسئلة كتير حضراتكم سألتوها عن منتجات متخصصة في الحمية الغذائية
والتخسيس ومنها القهوة الخضراء الي بتبيعها بعض الشركات أو الأشخاص على
وسائل التواصل الاجتماعي بمبالغ خيالية ولما تسأل ليه يقول لك أصل المنتج مستورد يا فندم .
سيبنا بقى من المستورد ومن الكلام ده لأن أغلب الي بيتباع على
وسائل التواصل الاجتماعي وبيجيبوا فنانين عاملين شفط
ونحت علشان يروجوا لمنتجات أغلبها متهرب وضار بل
وأحيانا مضروب وحضراتكم بتقعوا ضحايا ليها .
القهوة الخضراء من كام سنة حبيت أجربها فطلبتها من محل البن الشهير الواقع
أسفل البرج الي ساكنة فيه فجابها لي حبوب بن
وقال لي مش بنطحنها خضراء لأنها ممكن تبوظ لنا آلات الطحن…
وانا بصراحة جربت ومعرفتش اطحنها وكانت تجربة فاشلة .
انما مع الإعلان عن هذه القهوة ومنافعها في التخسيس
بدأت محلات البن من فترة في توفيرها مطحونة
ومعبأة والطحن بيكون بدرجات حسب كل محل انما في الغالب بيكون ده شكله زي ما هو واضح في الصورة .
طب يلا بينا نتكلم في عجالة عن القهوة الخضراء والتخسيس …
القهوة الخضراء تحتوي احماض منها الكلوروجينيك … الحمض ده كل ما بنحمص حبوب البن كل ما نسبته بتقل … الحمض ده في دراسات بتقول ان له دور في زيادة معدل الحرق بالجسم وتقليل الشهية وتحسين مستوى الكوليسترول في الدم وتقليل امتصاص الكربوهيدرات .
كمان من فوائد القهوة الخضراء تحسين الدورة الدموية واحتواءها على مضادات الأكسدة الي بتعطل ظهور أعراض الشيخوخة على الجسم والجلد والبشرة وتلاعب دور في الوقاية من الجذور الحرة أو مسببات السرطان .
طيب ايه المحاذير الي لازم اخد بالي منها ؟؟؟
طبعا لأنها في الأساس حبوب بن فهي تحتوي على الكافيين الي بدوره بيسبب اضطرابات النوم وتسارع ضربات القلب وتقلصات بالمعدة عند الافراط في الاستهلاك … لذلك مرضى اضطرابات ضربات القلب أو مرضى الغدد التي تسبب اضطرابات في ضربات القلب لازم ياخدوا بالهم .
كمان بيسبب كثرة التبول ودي حاجة انا بعتبرها مرة مش عيب لأنك هتعطش وتشرب كميات كبيرة من الماء .. الماء في حد ذاته بيعلي الحرق في الجسم وبيعمل على نضارة الجلد والبشرة وتأخير شيخوخة الخلايا .
عارفة الأسئلة الي حضراتكم هتسألوها …
☆ تنفع للحامل أو المرضع؟؟؟
سيادتك ده كفايين فبالتأكيد له محاذير في استخدامه
☆ هي القهوة العربي هي نفسها القهوة الخضراء؟؟؟
لأ القهوة العربي بيتم تحميصها نصف تحميص وبيضاف لها الحبهان أو الهيل والزعفران لذلك بيقول فيها نسبة الحمض الي اتكلمنا عنه .
☆ اجيب منين القهوة الخضراء؟؟؟
أي بتاع بن محترم وفكك من المنتجات ذات الأسعار الخيالية حتى لو قالوا لك انها خلاصة الخلاصة وزهرة الزهرة .. الحبة الي قدام حضراتكم دول بحوالي 30 جنيه فقط وبيكفوا مدة .
☆ اعرف منين انها بلا إضافات أو مش مغشوشة ؟
اذا حضرتك عملتها وتركتها هيتحول لونها من الاصفر الشفاف لون الينسون كده للأخضر الزيتوني لون الصورة المرفقة بالبوست .
☆ استهلك منها قد ايه؟؟
على حسب استهلاكك للقهوة وعلى حسب تحمل جسمك ليها بدون خفقان زيادة في القلب أو أرق … في الغالب الحدود الآمنة هي 200 ملجرام (كوب متوسط) مرتين تلاتة في اليوم . ولو حصلت لك اعراض قلل الكمية .
☆ هل هخس عليها؟؟؟
بتخسس فعلا بشرط تنظيم اكلك وتقليل السكريات والنشويات والدهون او منعها والافضل اتباع نظام الصوم المتقطع الي بيمتد لستة عشر ساعة أو أكثر من ضمنها ساعات النوم مناكلش خلاله اي حاجة بس نشرب مياه ومشروبات بدون سكر ولا حتى سكر مخصص للدايت .
☆ كيفية تحضيرها ؟؟؟
تقدر تعمل كمية تنقع معلقة كبيرة على كمية مياه ساخنة وتسيبها منقوعة فترة ثم تغلى على نار هادئة ربع ساعة وتصفى وتشرب منها طول اليوم حسب رغبتك وفي الحدود الآمنة .
☆ طعمها ايه ؟؟؟
ولا ليها أي طعم … طعمها متعادل ومش هتحس بيه
☆ أصحاب أمراض الضغط أو القلب أو الغدد الصماء والحامل والمرضع لابد من استشارة الطبيب عن امكانية تناولها من عدمه .
دمتم سالمين طيبين أصحاء
Abeer Almasry، Walaa Hassan و٧ آلاف شخصًا آخر
١٫٢ ألف تعليقًا
٤٣٢ مشاركة
أعجبني
تعليق
مشاركة
