admin 
عفاف أحمد التركي
فرّق خُطا الشقّاي..صدقة علي الراحة
وان قلت بعض كلام اسمعني بالراحة
احنا المكن..والسير ..والبيعة طرّاحة
واحنا غثاء السيل ..وغنوة التراحيل
بيرك غويط وكحيل..تقولش حاوي الليل
بعد اللي مات واقف..يعلي الهتاف للموت
الصوت عيار خايف..خلّا الكلام بشروط
خلّا الشروط حلمين ..اوّلهم اتفسّر
والتاني بيقصّر..حوالين مقام بيفوت
أنّ السؤال كده ليه..فززّني م النومة؟
وازاي عديم الرؤي.. بيشوف لنا الطالع؟؟
باقي معاك الفرق..من حسبة الاحلام؟
ادفعها للتواريخ ..ولبوابات الضي
ما بقيتش فارقة كتير ..
اللي مات ابقي والا اللي،ابقي الحي؟
ما اسمعش منك أيْ..ولا نكتة م الخارجين
جوا بلاد الاحلام… في كل نومة كمين
والسحب ع المكشوف..
نصل السكات محفوف..ف ادبح وما تسميش
ساقية ودايرة يا بيه..والغلّة ما بتكفيش
رصّ الهوام طرابيش.. علي رأسنا ولسانّا
.دمي اتبدر حنّة ..فغمّسوه بالعيش
اخدوا الامان منّي..علي اني مش موجود
مضروب في ذات نفسه ما عادش بيساوي
وأنا كنت باصحي الصبح ..مرتاح لها وناوي
تملا الصبايا الميّ..واملاني،بغناوي
يا صبر يا مداوي..فيتاني تعشيقة
البلّة ما ترويش،.. ولا فارجة ع الضيقة
فهاتني م الآخر .. وقولني ..واسمعني
ماعادش يمنعني حس التروس جوّاك
لو خط سير باعني..هارجع له تاني معاك
فليحيا صوت الوَشْ..والهبد..والزيطة
حلم الغريق القش..وانا حلمي تحويطة
عِد اللي راح وماجاش..واللي انتقي الاوباش
واللي اندفن عايش.. بقي صورة ع الحيطة
لسه المكن داير ..ما سمعش تفسيري
كتّر تلاااف خيري ..
ابدعت م الاوجاع
كاام عقدة وشنيطة .
