admin 
محمد البنا – مصر
الفقرة الرابعة
أقعدي يا فاطمة جاري
ده زمن محتاج لصبر
السما بتمطر بلاوي
والبشر شغالة هبر
اللي طيب قال عبيط
والخبيث قال إيه حويط
واللي ماشي ف ضل حيط
هو ده اللي انتصر!!
ياااااااه يا فاطمة
ده زمن مليان عبر
الجرايد ع الحبال تنشر فضايح
محسن سرق
محسن لهف مليار وزق
صفحة تانية..
محسن رجل أعمال وناجح
والخبر ده لسه طازة
ابن محمود الصغير
الليلادي عاشر جوازة
والجنيه يا اخوانا بشرى
لسه عايم ف الازازة
جيبنا خابور اكتواري
ف الكرة عالم أراري
بص ف الفيلات وقال
كل ده آخر جمال
لسه حافظين التراث
والبهايم والجمال
حقكم ف الكورة..صفر
قهر دووا واللا كفر
الحريم شغتلها رقص
والرجال على بعض خبص
كلنا بنبيع كلام
كلنا بناكل كلام
كلنا..هجص ف هجص
أفهميها يا فاطمة زي ما تفهميها
الحياة ديا بتاعتكوا
اللي زيي ملهوشي فيها
ده زمن محتاج لعاقل
وانا..
أنا مخي ناقصه فص.
