الموعود

ناس كتير واقفين قدام بيتي، زحمة، اصوات كتير بتصرخ بنفس الكلمة “الموعود”،

جريت ناحية البيت وكل الخطط اللي بتترسم في دماغي بتقول حاجة واحد

وهي موت حد من عيلتي، اقتحمت البيت بكل قوتي علشان الاقي أمي نايمة على سريرها

وحواليها تلاته من ستات القرية وهنا عرفت اللي بيحصل، النهاردة معاد

ولادة أمي لطفالها التالت وكالعادة أهل القرية مستنين جنس المولود.

مر حوالي نص ساعة وخرجت واحدة من الستات وعلى كفها الطفل،

وقفت قدام كبير القرية وبصت في الارض وقالت “بنت”.

اتحولت الاجواء من الصخب والصراخ لهدوء تام، بص كبير القرية للست

وقال: كدا زادوا واحد.

الكل فاهم قصده ماعدا أنا، واقفة وكأني غريبة عنهم، مش فاهمة حاجة،

عيونهم مليانة غضب، نظرتهم مليانة شر لكنهم عاجزين عن فعل أي شئ.

دخلت الست وحطت أختي الجديدة جنب أمي وقالت جملة واحدة

“أكفي القدرة على فمها، تطلع البنت لأمها”

مش أول مرة أسمع نفس الجملة من نفس الست!

قالتها قبل كدا في يوم ولادة أختي الأولى اللي ماتت بعد أيام قليلة من ولادتها،

والنهاردة بتكررها للمرة التانية، شئ غريب! الوضع كلو غريب

وخصوصًا إن أمي مبتحبش الست دي ودايمًا بتحذرني من الكلام معاها

وبتمنعني أروح عند بيتها، فأيه اللي يخليها تيجي بيتنا؟

هديت الأجواء لكن عقلي مهديش، فضلت قلقانة

وبفكر في الموضوع لأنه مش مطمئن خالص لكن موصلتش لنتيجة،

ملقتش حل غير إني أروح لأبويا يمكن يكون عارف سبب اللي بيحصل لو في حاجة

بتحصل او على الاقل يقولي إذا كان تفكيري مفيد ولا لسه طفولي

وساذج زي ما كان بيقولي دايمًا.

أبويا راجل بسيط، مختلف عن اني كتير في الشكل

والطبع، يمكن أختلاف جنسيته هو السبب في دا

وممكن يكون في سبب تاني، في النهاية هما انفصلوا من شهور

لسبب رفضوا انهم يوضحوه قدامي.

وصلت متجره الصغير وقعدت قدامه من غير ما أتكلم، قرب مني وحضني كالعادة

وبعدها رجع مكانه، محبتش أضيع وقت فحكيت له اللي حصل بكل تفاصيله وبعدها استنيت رده.

_ الموضوع كبير، وأظن عقلك مش هيقدر يستوعبه لكن هحكي لك كل اللي أعرفه علشان مفيش

وقت أنسب من دا أخرج فيه السر اللي مخبيه في قلبي من سنين كتير.

القصة بدأت بعد موت جدك اللي ساب ميراث ضخم لأمك وخالك حسن

ولكنه كان عبارة عن مقبرة أثار، حسن قرر انه هيبدأ يحفر بهدوء

ويفتح المقبرة علشان يغير حياته ويجرب عيشة الاغنياء لكن الموضوع مكنش بالسهولة دي.

مجرد ماهو قرب من المقبرة وبدأ يحفر أغمى عليه ولما فاق قال أنه شاف حاجات غريبة مقدرش عقله يستوعبها وكمان مقدرش يوصف اللي شافه، القصة انتشرت في القرية ومن ساعتها ظهر شر أهل القرية تجاهنا وهددونا بالقتل لو حد حاول يقرب من المقبرة ودا أكيد مش خوف علينا دا طمع وطموح انهم يفتحوا المقبرة ويستولوا على كل اللي فيها.

جابوا شيخ علشان يكشف على المقبرة وقالهم انها محصنة بالجان اللي كان السبب في اغماء حسن، وبعد جلسات مخاطبة مع الجان طلب منهم قربان مقابل الخطر اللي تعرضه لي من جانب حسن وكان القربان عبارة عن دبح مولود ذكر من نسل حسن وممكن يتعوض الذكر بأنثى عاشت ١٥سنة ولكن قابلتهم مشكلة وهي انهم قتلوا حسن بعد ما اتهموه بالجنون بسبب كلامه اللي كام بالنسبالهم خرافات، عملوا جلسة مخاطبة تانية مع الجان وعرفوا إن القربان ممكن من نسل دم مشترك مع حسن يعني بمعنى أصح أخواته وهو مكنش عنده اخوات غير أمك، فبقينا أحنا مطالبين بتقديم القربان للجان علشان أهل القرية يتمتعوا بنعيم المقبرة ولكن أحنا مكنش عندنا ذكور واللي هما ميعرفهوش إن الجينات الوراثية بيني انا وامك بتكون أناث بس.

ضغطوا علينا من سنتين نخلف للمرة التانية ولكنهم اضايقوا لما لاقوها بنت وبمجرد ولادتها عرفوا إن مع كل بنت هتتولد هيزيد واحد من قبيلة الجان لحراسة المقبرة فدخلت عليها زوجة الشيخ وقالت في ودنها “أكفي القدرة على فمها، تطلع البنت لأمها”، خرجت وسابت البت تتخنق لحد ما ماتت وهما فاكرين أنهم هيتخلصوا من الجان لكن دا محصلش.

ضغطوا علينا علشان نخلف تاني لكن المرة دي في نص الحمل زوجة الشيخ بلغتهم انه ذكر، فخلوني اطلق امك لانهم مبقوش محتاجني لكنهم اتفاجئوا انها برضو بنت وعلشان كدا زوجة الشيخ قالت نفس الجملة وزمان البنت ماتت دلوقتي وبكدا مفيش قدامهم غير الحل البديل”ممكن يتعوض الذكر بأنثى عاشت ١٥سنة”.

عيد ميلادك ال١٥بكره يا جميلتي وانا اول واحد جبتلك هديتك.