admin 
شعر / ماهر أبوالمعاطى
الرجولة
……
وأتسربل العشق القديم
ف خلئة كانت بدلتك
يوم الزفاف
إياك تخاف
لو عشت عمرك
تتكفى
ف سنين عجاف
هو كده طبع النسا
يفرق صباحهم ف الغرام
عن عشقهم عند المسا
أفهم طبيعة لاختلاف
الحب عندك معضلة
تلقى ف غيرتك مشكلة
عايز حلول
عمال تجول
ونظرة منها ترجعك
وتعيش هوى
حد الكفاف
كل الأحبة
ف البداية يبهروا
زيف المشاعر
ف النهاية يظهروا
أول خلاف
العشق جواك هرجلة
عايشه ببساطه مذهلة
وهى بتخطط تمام
هواها عايش ف التزام
ماسكه بإيديها الزمام
سايباك ف حيرة وبرجلة
الهوى محتاج لعقلك
يحكمه
محتاج كرامة
تشكمه
ودمع قلبك
لجمه
وخبى شوقك عنها
جوه توب المرجلة
يا مُبتلى
لو حب عمرك يسبلك
ويسلسلك
بعهد عمر
ف سكتك
ولى وفات
أصل عيبك
طيبة واضحة
نية فاضحة
بين كلامك والسكات
والمشاكل كلها
ساكنة ف القلب الحنون
جوه قلبك للأسف
لقلب بيسيب الهوى
ف وضع السكون
الحل دايماً
ف الغرام
تستغنى عن عشق العبيد
يا الكفة واحدة
وتتوزن وإيد بإيد
يا تعود لأصلك
يصلبك زى الحديد
وتكون كنخلك
ف الخلا
قلبك رطب
عودك جريد
أصل الرجولة
مش شوارب تتبرم
ده فعل جواك محترم
فعل الرجولة ف الهمم
كالدم يسرى ف الوريد
أعرف طبيعة للرجال
ده أصل راسخ
كالوتد
زى الجبال
إياك تطاطى للقلوب
العقل بيداوى العيوب
عود النخيل مصلوب
شامخ وباصص للسما
فأحذر بقى من مكرها
لو حتى جات مستسلمة
الهرمونات
بتقول حاجات
أما الحقيقة مؤلمة
لو قِدت حتى العشرة شمع
راح تلقى جوه عينيها دمع
بيقول بحبك … إنما
لازم تكون لى
راس براس
وأنا زى زيك بالتمام
وده الأساس
لازم حبيبتى تفهمى
أن الحياة
راجل وست
من ضلع آدم
تيجى حوا
تكريم آلهى
وسر قوة
بس نرجع للأساس
الست درع لعرضها
من ضعفها
تيجى قوة منحها
أما أرضى ف الرجولة
سرها
الطين ضلوعى
ودراعى فاس
يعنى تفضيلى بدرجة
حكم بشقايا لخدمتك
ورحمة بالبيت والعيال
قبل أما تيجى وتعشقى
لازم لحكمة تصدقى
بيوت الأصالة بتتبنى
بست قاعدة ف خدرها
ورب بيتها يظلها
ستاتنا زرعة أرضنا
وبذرة الأرض الحلال
أما السقاية أصلها
جايه من صُلب الرجال
………
