admin 
شعر :عفاف أحمد التركى
اللون الأول..
…لون الهوي المنقوش علي جبينك..
والأغنيات البِكر ..
والتوهان ..
لون عجين الخصب..والدوران….
وشقشقات الرعشة في الصلصال..
لون الحكاية المفردة في قولنا..
وانعكاس إحساسنا ع الأفعال..
لون خضّتك
..ومحبتك..وجفاك..
رجفة دفانا …
وشرقة الموال
اللون التاني..
توزيع مناب الجاي ع اللي اتعاش..
قدر اكتشاف الصادق الغشّاش..
لون انتحال الموتة في الانعاش
..لحظة طلوع الروح ..
وتصويرها..
.ولحظة ما يسري الضي..
فـ وتيرها
..زي لون ايدنا في عز البرد ..
.وهي بتمارس عبور روحنا..
وهي،بتلملم ملامحنا
شيء من اللي فاضل فينا ..يكفينا .
.لون بيبدع فن تجريحنا
اللون الثالث…
لون ما وردش من بابُه..
مفرقينه وكله بثوابه ..
صدقة علي روح اللي حب بجد..
أصل إللي حب ..إتداري ف أحبابه..
لون ما بهتش علي سقف اوجاعنا..
ولا طلسموه علي ظهر كذاّابه..
لون بوابات الفكرة لو شاردة ..
لون تشبيكات الظل …
والزخاريف..
لون العطش..
لو شقّق التجاويف..
ونفس،لون الشِعر واصحابه
اللون الرابع..
اللي انطلق واتغش في النهايات.
.وخد في باطه دموعه وصاحبها..
لون انتفاء الصدق في الكنايات ..
لحظة دفاك ما كان مسرسبها..
لون مُباغت ..اتصب ع الحكايات..
لون سند بخته ع القسمة ونصيبها..
لون رهان خسران اترّف علي روحي
كان الملك صورة متعلقة ..
وكانت الكتابة .. خطاوي متزوّقه ..
فتشت زواقها..
فـ..ابتسم عيبها
اللون الخامس..
ملامس خدها البردان ..
سري بروحها علي براق ذاتها..
.الفجر نام علي صدرها نعسان..
والليل سرد علي روحه حواديتها..
لون خجول البسمة ..
وفاجرها..
ضحكة ما بين عمرين .معنوّنها
قلبي حضر القسمة ..
ف اتعاركوا..
اشهر سلاحه العشق..موّتها
لون إللي وزّع شوف ..
علي المكافيف..
لون إللي خطّي بقلبه عتبتها
اللون السادس..
سطر ارتجال الغُنا..وانحناء الآااه..
وفجوة المعننة ..
وميّة المحاياة..
طرح السبيل للشوق.. لأجل تسبيحه..
يا هوانا يا أبو ريحة ..
بتتدروش المعاناة ..
وتزفّنا بدمعُه..
قلبي إللي،ساح شمعُه..
وبفتلة منقادة
..يا هوانا يا عبادة ..
قصّرت ليه فـ جمعُه..
سرح الغُنا فـ معناك..
رفع الأذان ..علّاك ..
وصبحت مش سامعه
اللون السابع..
ساب ايديك برضاه.. لمّا اتلوي فـ حُبّك
..زي لون عرّاه..والذنب مش ذنبك ..
يا موحدين الله الحب له سلطان..
عدد اللي كان ياما كان ..
عدد اللي فات جنبك..
من أول الأسئلة ..ولحد ما تجاوبك..
ألوان ومتكررة ..صافية ومتعكرة
..فيها م الحدّة وفيها متنكّرة..
قاطعة لعبور الروح يجيي600 تذكرة..
ذهاب غياااب عودة ..
طول الطريق منامات..
طول المنام شاردة ..
يا أيها المجروح ..
حسّيت طنين الروح..
لمّا شق البور..
وطرحني 100 وردة..
وقطفني قلت (ااالله).؟؟؟
