admin 
كتبت : بشري حبيب المدربه والمستشاره التربويه
يعنى مين يقول ان الطفل ده توحد أو فرط حركه مثلا ؟!
فريق تأهيل متكامل مكون من
طبيب مخ وأعصاب … نفسيه وعصبيه … بيحولك على أخصائي تخاطب (لو فى مشكله واضحه فى الكلام ) … وأخصائي التخاطب بيحولك بعد الملاحظه والتقيم ..لأخصائي نفسي (لعمل الاختبارات والمقاييس اللازمة )
وبعدين حضرتك بتاخدى تقرير من الأخصائي النفسي وأخصائي التخاطب وترجعى لدكتور المخ والاعصاب أو النفسيه والعصبيه (على أساس الحاله ) وبيكتب الدكتور التقرير النهائي ونمشي بقي فى الطريق العلاجى والتاهيلى الصحيح
طب ايه ده يعنى لازم ألف اللفه دى
للاسف اه…
طب لي هو الدكتور مش هيعرف لوحده أو الأخصائي
أو المقياس لوحده
لا طبعا …
لان دكتور المخ والأعصاب مش بيقعد مده كافيه مع الطفل فممكن يكون الطفل فرط حركه وتشتت الانتباه… ومن حركه أو حاجه الطفل عملها يقول توحد أو العكس أو هو فرط حركه وتشتت انتباه ويقول حرمان بيئي علشان ما لاحظشي الطفل فتره كافيه …
طب مين يقوم بالملاحظه وتقيم الطفل فى الجوانب المهاريه أخصائي التخاطب …
طب ما أخصائي التخاطب يقول عنده إيه ونخلص
لا أخصائي التخاطب يكتب تقرير فيه كل جوانب النمو والمهارات والقصور ويحولك على أخصائي نفسي
أخصائي نفسي يعمل أختبارات على أساس تقيم أخصائي التخاطب وجوانب القصور والاعراض يثبت بالدليل ما يعانى منه الطفل …
وبعدين ترجعى لدكتور المخ والاعصاب
طب هل التشخيص هيفرق فى التأهيل وطريقته؟!
آه طبعا … كل تشخيص وكل اضطراب وله طريقه تأهيل وبرنامج وخطه تأهيليه وأسلوب خاص …
يعنى طريقه التخاطب والاساليب المستخدمه مع طفل التوحد مختلفه تماما مع فرط الحركه مختلفه تماما عن التأخر اللغوى الناتج عن الحرمان
