أهم الأساليب الخاطئة في تربية الطفل

كتبت :  بشري حبيب المدربه والمستشاره التربويه

أولاً : التسلط

هو الزام الطفل بسلوك معين أو منعه انه يعمله علي الرغم من ان السلوك ده مش مضر ليه، بس بعض الأمهات والاباء بيصروا على أن الطفل ميعملش السلوك ده وبيفرضوا قيد علي الطفل،

وبالتالي الطفل بتكون شخصيته قلقة، ومش عنده ثقة بنفسه وكمان مش هيكون عنده القدرة على اتخاذ القرارات.

ثانياً : إهمال الطفل

ده اسلوب بيمارسه بعض الآباء والأمهات مع الاطفال، يعتمدوا على أنهم يسيبوا ولادهم من غير ما يشجعوهم ولا يحفزوهم،

ويكون الطفل محقق انجاز، بس الوالدين بيهملوه ومبيهتموش  بتفوقه، وبالتالي ده بيؤثر على الطفل بالسلب

وممكن جدا مستواه الدراسي يتراجع بسبب اهماله ويصاب الطفل بالإحباط.

ثالثاً : تدليل الطفل

هو تشجيع الطفل دائما على تحقيق كل حاجة هو عايزها وان الوالدين ما يمنعهوش عن أي حاجة حتى لو كانت غلط او غير مقبوله من ناحية الدين او الاخلاق او المجتمع.

ودي حاجة هتخلي الطفل لما يكبر ويطلع للمجتمع يتعرض لانتقادات كتيره جدا من اللي حواليه، وكمان هيكون غير قادر على تحمل الإحباط أو الرفض.

رابعاً : التذبذب في معاملة الطفل

ده سلوك من أخطر السلوكيات الغلط اللي بيقوم بيه الاب والأم.

وهو يعني ان الطفل لما يقوم بسلوك معين مرة يثاب عليه ومرة يتعاقب عليه.

زي مثلا لو الطفل شتم اهله يضحكوا بس لو عمل نفس الفعل قدام ضيوف يقومون بتوبيخه.

والاسلوب ده عادة بيخلي الطفل يكون ليه شخصية مزدوجة ويكون طفل متقلب، وغير قادر على التفرقة بين الأفعال الصحيحة والأفعال الخاطئة.

خامساً : الخوف الزيادة على الطفل

الاب والام لما يكون خوفهم زيادة على الطفل ويمنعوه يتحرك لوحده ويخلوا اي فرد من أفراد الأسرة او المساعدة دايما ورا الطفل، زى مثلا لما يلعبوا او يروحوا للجيران.

وده من ضمن الاساليب الغلط لانه بيكون كده طفل سلبي ومش متفاعل مع الناس وبالتالي ده بيسبب الانطواء للطفل.

سادساً : الكذبة البيضاء

هي إسلوب بيعمله الأب أو الأم زى مثلا حد بيتصل على التليفون عايز الأب فيرد الطفل ويشاور ليه الأب انه يقوله أن بابا مش موجود مثلا..

ومع تكرار ده الطفل بيتعود على الكذب وبيشوفه حاجة سهله وبيكون سلوك الطفل غير سوي.

سابعاً : التفرقة بين الأطفال

يعني ان الوالدين مايساوش بين الأطفال ويفضلوا حد على حد.

الولد على البنت أو الكبير على الصغير…  أو مايساوش في التعامل بينهم. وبالتالي العلاقة بين الأطفال بيكون فيها توتر كبير.

والطفل اللي بيكون في أسرة زي دي بتمارس التفرقة بين الأولاد بتكون مع الوقت شخصيته انانيه، وينتقم من الآخرين نتيجة التفرقه وعدم المساواة اللي اتعرض ليها.