أنا مش مسافر

الشاعر محمد أحمد اسماعيل _ مصر 

أنا مش مسافر
بس ف عيوني سفر
عريان.. وروحي باب على كل الجهات
وقلبي مسكون بالمطر
راكب على غنوة خطر
قلقان بافصَّل م القلق
ريش وجناحات
مخنوق سكات
مشنوق كلام
حي.. وقتيل
ثابت.. وباجري ألف ميل
في كل ميل حرب وسلام
شابت خدود حلمي الجميل
على حدود الأسئلة والمستحيل
وأنا.. أنا
بانقص وازيد
في كل عام
وف كل عام
نفس الخناقة جوايا
بين هابيل وقابيل على الوِرث الحرام
وف كل عام
عمري بيتقطع دليل
على سكك غربة.. وليل
وشهود براءتي ف محكمة..
من غير قضاة
من ألف عام..
واقفين أدلة اتهام

أنا مش مسافر

محمد أحمد اسماعيل