admin 
الشاعر أيمن عبده – مصر
إرقيني يامّٓه
واقرأي “السبع المثاني” واستعيذي باليقين
حطِّي إيدك فوق جبيني واحتويني
قلبي يامّٓه سقفه عريان استريني
مش بيتحمِّل مزيداً من جبايات الجباية
أيوه يامّٓه فيه ضرائب ع المشاعر لو تبان
قلبي يامّٓه بات جعان
فاقرأي لي من آيات سورة ” قريش”
واحضني الخوف اللي باين من ضلوعي
لملمي الصيص اللي واقع من فروعي
واعملي لي بيت في قلبك يا بهيّٓه
وافتحي أبوابه دايماً ع النهار
بيت بيخلو م الضرائب أو قوانين العقار
زيدي يامّٓه في القراءة استحمليني
أصلي محتاج الخلاص
والحوائط جوه روحي نفسها ف حبة حماس
لجل تجتاز الشروخ الساكنة فيها
من فواتير المرافق واللي وافق يجتبيها
قلبي يامّه صوته تعبان احتباس
فاقرأي لي ما تيسّٓر من آيات الحب فيها
يمكن أقدر رغم خوفي واحتضاري ألتقيها
واعتباراً إنّي ميِّت فاقرأي لي من ” يس”
أيوه يامّٓه صدقيني قلبي مش قادر يدق
حطي إيدك فوق جبيني يمكن الأحزان ترق
يمكن الغيمة اللي جايه فجأة تتحول سحاب
تغسل الأيام فنلقى الفجر شق الفقر شق
زيدي يامّٓه من دعاءك قلبي محتاج الدعاء
أصل عيني غصب عني بتساعدني ع البكاء
والجباية مش بترحم أي سقف بيسقيم
واللي ساري فينا يامّٓه ده قانون الاستيلاء
