بندر بن سلطان … انا ولد منهـو يحـل الشرابيـك

يالله ياللي كـل مخلـوق يرجيـك
ياعالـم حالـي عزيـز الجلالـي

يا مستجيب لدعوة اللـي يناديـك
افرج لمن كنه على حـر صالـي

قد قيل قبلي من هرج بك هرج فيك
وخلاك تكره واحـد كـان غالـي

خلاك تكـره واحـد كـان يغليـك
لو كان من ربعك قريـب اموالـي

والجد مايرفـع مقامـك ويحييـك
ليا صرت من كل المواجيب خالـي

والخال ليا ضاعت سموتك يخليـك
ماينفعك لو قلت ابو زيـد خالـي

وانا ولد منهـو يحـل الشرابيـك
يذكر اليا عـدت فعـول الرجالـي

ولاني عشير للرخـوم الصعاليـك
اربوعي اللـي يلحقـون التوالـي