أصرخ أقول الموت وأحذر الناس
هناك قصائد خالدة في اذهان عشاق الكلمة الشعرية يستلذون انغامها ويتعايشون مع مفرداتها لانها تحكي وتصور قصة من الماضي…
رواية لا تحتاج لراوي فالنص الادبي يفسر مدلولها ويوضح للقارئ مكنونها..
مثل هذه القصيدة للشاعر / نمر السحيمي الذي رثى نفسه قبل رحيله بيومين.. غفر الله له واسكنه فسيح جناته: –
جاني وانا في وسط ربعي وناسي
جاني نشلني مثل ما ينشل الناس
مني نشل روح تشيل المآسي
تشكي من ايام الشقى تشكي الياس
اثر الألم في سكرة الموت قاسي
ما هالني مثله وانا انسان حساس
جابوا كفن ابيض مقاسه مقاسي
ولفوا به الجسم المحنط مع الراس
وشالوني اربع بالنعش ومتواسي
عليه ومغطى على جسمي الباس
وصلوا علي وكلهم في مآسي
ربعي ومعهم ناس من كل الاجناس
يا كيف سوا عقبنا تاج راسي
وامي الحبيبه وش سوى بها الياس
اسمع صدى صوت يهز الرواسي
قولوا لها لا تلطم الخد يا ناس
قولوالها حق وتجرعت كاسي
لا تحترق كل يبي يجرع الكاس
اصبحت في قبري ولابه مواسي
واسمع قريع نعولهم يوم تنداس
من يوم قفوا حل موثق لباسي
وعلى رد الروح صوت بالاجراس
هيكل غريب وقال ليه التناسي
صوته رهيب وخلفه اثنين حراس
وقف وقال ان كنت يا نمر ناسي
هذي هي اعمالك تقدم بكراس
ومن هول ما شفته وقف شعر راسي
وانهارت اعصابي ولا ارد الانفاس
يا ليتني فكرت قبل انغماسي
بالغفله اللي منتهاها للافلاس
وفزيت من نومي على صوت ناسي
وأصرخ وأقول الموت وأحذر الناس
http://52.214.82.70/51764