admin 
شعر : ليلى صلاح
نمرة غريبة ودقة قلب
إمبارح رن التلفون
قبل الفجر يادوب بدقايق
رن كتيرجدا بجنون
وأنا نايمة ومزاجى مش رايق
،،،،،،،،،،،،،،،،،
نمرة غريبة مش عارفاها
مين ويايا هاقفل مين؟
رد عليا انا ياحبيبتى
مش عارفانى يانور العين
بس النبرة دى حفظااااها
عمرى ما يجى اليوم وانساها
روحى كانها راحت مين
رد بجد بكلم مين؟
قالى يالولو خلاص نسيتنى
ونسيتى انك نبض سنينى
وإنى لايمكن أفارقك خالص
راجع ليكى يانن العين
،،،،،،،،،،،،،،،،،،،
مش معقولة حبيبى بخير
أيوة ده صوته ودى نبراته
أومال ليه بكوونى كتير
صدمونى بخبر لوفاته
قال ياحبيبتى صوتك فين
ساكتة ياروحى يااحلى سنين
مش فرحانة بانى راجعلك
وانى معاكى بشوق وحنين
قولتله لا متقلش كدة
بسمع صوتك بشبع منك
حاسة بلهفة بشوق ورضا
مش متخيلة فعلا انك….
ولا خلاص مش هاقدر اقولها
ياما بكيتنى ليالى بطولها
ومافيش حاجة ف ايدى اعملها
غير أدعيلك واسمع عنك
،،،،،،،،،،،،،،،
عامل إيه ياحبيبى وفينك
إنت واحشنى بجد كتير
رد عليا بخير ياحبيبتى
وإنتى قوليلى بناتى بخير
قولته لأ الدمع مالينى
كل ما أبكى يبكو معايا
ويزودو احزانى فى عينى
إمتى يامامانروح لبابايا
أصله واحشنى ونفسى اشوفه
نفسى ياماما يرجع تانى
إمتى هيجى والمح طيفه
ولا خلاص مش راجع تانى
رد وقالى انا ويااااكو
مفرقتش ولا لحظة حياتكوا
إنتو حياتى وروحى معاكوا
ولا يمكن ياحبيبتى افوتك
طيب قولى ياروح القلب
إمتى هتيجى ياكل الحب
ياللا تعالى نعيش الفرحة
أصل فراقك فعلا صعب
رد وقالى خلاص ياحبيبتى
أنا مشتاقلك جدا جدا
وهاجيلك طبعا يااميرتى
لما يحين الوقت وياذن
متهزرش تعالى ياغالى
صوتك فين مترد عليا
ساكت ليه والصوت مش عالى
اختفى خالص ..رد عليا
،،،،،،،،،،،،،،،،
فجأة ببص على التلفون
شوفته بعيد عنى و مقفول
فاصل شحن …ملانى ظنون
يعنى أنا بحلم مش معقول!!
يعنى حقيقى راح مش راجع
مهما هنادى عليه مش سامع
يعنى انا كنت ف حلم وفوقت
وسابنى لوحدى وفارق الكون
وأنا مش هنساااه مهما يكون
