admin 
شعر : أيمن عبده
كما لو واد
مقابل بنت ع السلِّم
فيخبط فيها بالصدفه
تلم البنت كشكولها وتتلخبط
فيتلخبط كيان الواد
وينسى يلم ويَّاها
بواقي من جدايلها
كانت بتخبِّي في عيونها اللي مكسوفه
وتمشي البنت مش حاسَّه بخطاويها
ولا شايفه ف عيون الواد
ستاير كان مخبِّيها
بأول نظره لعيونها
وتنسى البنت م اللهفه
تلملم كل أركانها
يفوق الواد
على صوت الرياح الواصله لضلوعه
يفتَّح عينه ويشوفها
كما لو لسَّه موجوده
ويخبط تاني في السلِّم
فيسقط منه كشكوله
يميِّل لجل ما يلمُّه
يلاقي الريح بتحدفله
بواقي البنت نسيتها
قلم وكتاب ووردايه
وحبة روج وبرفانها
يضم الواد بواقيها
وينسى يضم كشكوله
ويمشي الواد ولا حاسس
ولا شايف
ولا سامع
ولا شبعان
ولا جوعان
ولا بردان
ولا دفيان
وتسبق هي من أول
طلوع الشمس للسكه
وتوصل للمكان جايز
تشوفه بيحضن السلِّم
فتخبط هي وتردد
بنفس الصمت إحساسهم
تاخدها الريح فتتمايل
فتسقط هي بالصدفه
وع الكشكول
تطير م الفرحه تتراقص
كما الفراشات
وتحضن هي نبض الواد
في كشكوله
وتتراقص
وتتراقص
فتخبط تاني بالصدفه
تفتَّح عينها فتلاقي
عيون الواد بتحضنها
