منصة المشاهير العرب مرخصة من الهيئة العامة للاعلام المرئي والمسموع السعودي , ترخيص 147624
واحة الإبداع

قصيدة لسّة ماتكتبتش

29/ ديسمبر /2020
avatar admin
158
0

شعر :نورا يحى 

بحلفلك
يا أجمل حاجة حبّتها
يا ذكرى حلوه خبّتها
فى نن القلب من جوّه
بإنّي يوماتي بتألّم
وبسأل نفسي ليه تسلّم
سنين العمر بالمجان
وليه حاسة
بإن بقالي
ألف مكان
فى بكره الغامض الداكن
دا جرح ومن سنين ساكنة
أساسًا جرحي لمّا بنام
بيبقى عتمة ملياني
تملّي ملازم الفَرشة
اللي من أحزاني كرهاني
وبردو ملازم الذكرى
عشان شبهي وبتعاني
لعمري سبت إيدك يوم
ولا نسيتك ف وقت النوم
وقلت لو الليالي تدوم
لكن ما دمتش والله
لا عمري قلتلك بره
ولا حتى طلبت مقابل
إن افضل واكون ويّاك
ولا استعجلت برحيلي
بسيبك يعني لما أنت اللي بتجيلي
وبستنّى مرور حلمك
عشان ياخد بايدي معاه
بلاقي الحلم يا ولداه
ف ايده حد تاني غير
هتعمل ايه بقى المناديل
وإيه ذنب
اللي قضى العمر
فيك سارح
وطارح نخله فيك طارح
يا قلبي حبيبك إتغيّر
حلف ع النعمه ليفوتك
وواخد عهد على نفسه
يكسّر كل مآديفك
ف وقت الفرح بيسيبك
ووقت الحزن بيضيفك
أنا اللي حياتي دي إفيه
غُلبت أنا فيه
ومن كتر إنه متكرر بقى بايخ
صدق مين قال
ساعات العشق بيبكي
ساعات العشق بيفرّح
أنا عايشة ومش عايشة
إذا حضرتني ذكرى عنيك
بعود حيّة
ولو حضرتني ذكرى الجرح
وطول القسوة من غير شرح
بلاقي الطّيبة تتحوّل ل سم لعين
وألاقيني بقيت حيّة
وناوية اموّت الباقيين
بسم الخوف
فحاذر من أزايز حبّك الفاضية
لتتحوّل تكون مولوتوف
بامد يديا بالمعروف
وصابرة وصبري ع الآخِر
جراحي وغربتي والليل
وكل كلامك الساخر
أنا دلوقتي م الآخر
بقيت أقوى
وبكره ف نفس ذات الوقت
ولو يعني ماصدقتش ولو صدقت
هكون أقوى كمان وكمان
وهتحدي الليالي تعود
عشان أنا ناوية أفض الجرح
جوّه قصيده توصفني
وحالاً بس فيها بدأت
عن الكاتب : admin
عدد المقالات : 11203

اترك تعليقاً

لن يتم نشر عنوان بريدك الإلكتروني.