admin 
شعر : منى حواس – مصر
وفي يوم كان حَر
أو يمكن برد
انا مش فاكرة
تحديداً
كانت شتا أو صيف!!
كان قلبي ضعيف
وبينزف آخر دقاته
مع أول دمعة
في جوف الآه
واللي انا فاكراه
إنك سنّيت
حرف كلامك
على دقة قلبي المشقوقة
فااتشقّت روحي اتناشر شق!!
أنا فاكرة الفرق
بين اليوم ده
وطلوع الفجر
في أول ضحكة
قابلتك فيها
في أول حلم
لأول يوم……
واتاريه النوم
ناوي يطوِّل
ويحوِّل
عيني عن المتشاف
قلبي الخوّاف
غمّاني وشد التعصيبة
على روحي عشان
ماالمحش عيوب
وانا كنت يادوب
بااتهجّى الحب
وافُك الخط
فرسمتك……..
حلمي المتسطّر
بين كان…….
ويكون……
ورسمتك فرحة بتملا الكون
وعاهدني الحلم تكون ليّ
وف لياليّ……
ترسمني غرام
وفي يوم
مش فاكرة له ملامح
وقفت الايّام…..
وصحيت على وجعك
في ضلوعي
ودموعي عيون
موجوعة بتحسب حسبتها
بين كان ومكانشي
وبكرة يكون !!!!
حتى الأحلام
طلعت بتخون!!
محمد حسني ابراهيم
18/02/2021 at 1:37 صقصيدة محملة بتفاصيل شعرية بسيطة تأتي فى بساطة شديدة مع عمق المعنى احييك