“فؤاده”

شعر : أيمن عبده 

**  **  **  **  **
يا أرض ليه عطشانه بزياده
كل الشقوق مزروعه بالأحزان
ريحة نسايم طرحك الساده
مكتوب عليها تخاصم الأجران
فضوا الهويس من زفة العشاق
خبوا الولاد في الضل من عتريس
حتى الحيطان المايله بالإغماء
محتاجه صوت الحب يبقى ونيس
ومنين يودي بس قولي لفين
كل الشوراع وحله شايله الطين
وعيون فؤاده بتشبه العكاز
يسند عليها العمر وقت الضين
مين اللي قال الآية مش مرسال
عابر لخوف القلب لما يخاف
لساها أرضي بتعشق الموال
والنبض أعمى لما كان شواف
إيد الشادوف الكسر باين فيه
مكسور جناح الساقيه مش مجبور
ف ازاي هتروي الجرح لو تكويه
وازاي تداوي الأرض لما تبور
يا روح فؤاده سنيني صابها جفاف
وجواز مرورك فيها مش باطل
كل الشوارع ضلمه لما تخاف
وانتي اللي عارفه البعد شئ قاتل