admin 
شعر : د . أحمد الجبالي
يوم الثلوث ومابعد حل العصر
غابت الشمس والظلمة مصـير
أمكم مـاتت ( كذا جـانا الخبر )
وانكسـرنا ومـابقـى فـينا بصير
ولا رحمنا شـوق مايفهم خطـر
ولا وقف دمـع بعـيون الكسـير
هو صحيح من القدر مابه مفر
اللي كتب ربي ندري إنه يصير
لكـن عـجـزنا ومـاهنا فينا صبر
أمـنا فـراقهـا حـيل والله عسـير
(والموت حق) لكن قتلنا القهر
وكل الحـياة بروحهـا عنا تطـير
كـيف تحي قلـوبنا وأمـي عمر
وبلا شوف لعيوننا كيف بنصير
اااه يالغــاليه ليته خذانا القـدر
ونرخص لك ارواحنا ماهو كثير
كم رضيتي بقلـيل وعطيتنا كثر
وكم نومنا طـــال ونومك قصير
وياما نثرتي حنانك علينا عطـر
وبحضنك دفانا وصـدرك سـرير
وتضحك عـيونك لمن منا حضر
وغيابنا بك يحترق قلب(ن) كبير
وبيننا ابتسـاماتك أرق من الـزهر
وأنفــاسـنا حـولك تشميهـا عبـير
رحـيلك اليوم أقسـى من الصخـر
وطعم الفراق حيل يا أمـي مـرير
غصب نرضى مهما عشنا في كدر
ونرفع يدينا ونرتجي لطف الخبير
وكل الرجـا بالجـنة يبني لك قصـر
والآخـره بلقــاك يجمعنا المصـير
